ठाण्यात पालकमंत्रि तिढा कायम; भाजप-शिंदे गटात जोरदार रस्सीखेच

ठाणे : राज्यात महायुतीचे सरकार स्थापन झाले असून खातेवाटप देखील पूर्ण झाले आहे. मंत्र्यांच्या खाते वाटपानंतर आता पालकमंत्री कोण होणार, याची चर्चा रंगू लागली आहे. ठाणे जिल्ह्यात पालकमंत्रिपदाची माळ कोणाच्या गळ्यात पडते, याकडे ठाणेकरांचे लक्ष लागून राहिले आहे.ठाणे जिल्हा हा शिवसेनेचा बालेकिल्ला समजला जातो, परंतु विधानसभा निवडणुकीत जिल्ह्यात भाजपचे नऊ तर शिवसेना शिंदे गटाचे सहा आमदार निवडून आले आहेत. सध्याच्या चित्रावरून जिल्ह्यात भाजपच मोठा भाऊ असल्याचे दिसून येत आहे. त्यामुळे जिल्ह्याचे पालकमंत्रिपद भाजपलाच मिळावे, अशी भाजप कार्यकर्त्यांची भूमिका आहे. या पार्श्वभूमीवर भाजप आणि शिंदे गट यांच्यात या पदासाठी जोरदार रस्सीखेच सुरू आहे.

आगामी महापालिका निवडणुका स्वबळावर लढवून त्या ताब्यात घेण्यासाठी शिंदे गटाबरोबरच भाजपनेही कंबर कसली आहे. नुकत्याच झालेल्या विधानसभा निवडणुकीत ठाणे जिल्ह्यात भाजपचा स्ट्राईक रेट १०० टक्के असून त्यांचे नऊ आमदार निवडून आले आहेत तर शिंदे गटाचे सहा आमदार निवडून आले आहेत. त्यामुळे जिल्ह्यात भाजपचे वर्चस्व दिसून येत असून स्थानिक स्वराज्य संस्थांमध्ये देखील वर्चस्व निर्माण व्हावे यासाठी भाजप प्रयत्नशील आहे. विकासनिधी आणि प्रकल्पांच्या दृष्टीने पालकमंत्रिपद महत्त्वाचे असल्याने या पदासाठी भाजपने जोर लावला असून शिंदे गट देखील यासाठी प्रयत्नशील आहे. शिंदे सरकार सत्तेवर असताना ठाण्याचे पालकमंत्रिपद शिवसेनेच्या शंभूराज देसाई यांच्याकडे होते. त्याआधी २०१४ ते २०१९ आणि २०१९ ते २०२२ या कालावधीत शिंदे यांच्याकडेच पालकमंत्रिपद होते.

शिंदे यांच्याकडे मुख्यमंत्रिपदाची जबाबदारी आल्यानंतर त्यांनी ठाण्याच्या पालकमंत्रिपदाची जबाबदारी देसाई यांच्याकडे सोपवली. आता शिंदे उपमुख्यमंत्री झाले आहेत. त्यांच्याकडे पालकमंत्रिपद देण्यात यावे, अशी सेनेची मागणी आहे.भाजपच्या आशा वाढल्याठाणे जिल्ह्यात ठाणे, नवी मुंबई, कल्याण-डोंबिवली, भिवंडी, मीरा-भाईंदर, उल्हासनगर या सहा महानगरपालिका असून दोन नगरपरिषदा आणि दोन नगर पंचायती आहेत. या स्थानिक स्वराज्य संस्थांच्या हद्दीत विकासकामे करण्यासाठी निधीची मोठ्या प्रमाणात आवश्यकता भासते आणि विकासनिधीच्या वाटपाचे अधिकार असल्यामुळे पालकमंत्रिपद महत्त्वाचे मानले जाते. विशेष म्हणजे ज्याचे जिल्ह्यात जास्त आमदार, सत्तेतील त्या पक्षाकडे पालकमंत्रिपद जाते, असे सर्वसाधारणपणे समीकरण असते. त्यामुळे भाजपाच्या आशा वाढल्या आहेत. त्या पार्श्वभूमीवर भाजपाने ठाणे जिल्ह्याच्या पालकमंत्रिपदाचा मुद्दा प्रतिष्ठेचा केला आहे.